बारा । बिहीबार बिहानदेखि बारा र आसपासको क्षेत्रमा एक्कासी चिसो बढेको छ । जल तथा मौसम विज्ञान विभाग फिल्ड कार्यालय सिमराका अनुसार बुधबारको तुलनामा बिहीबार अधिकतम् तापक्रममा एक्कासी गिरावट आएको हो ।
‘२४ घण्टाको तापक्रम मापन गर्दा आज (बिहीबार) न्यूनतम् तापक्रम १३ देखि १४ को आसपासमा झरिसकेको छ भने अधिकतम तापक्रम २० डिग्री सेल्सियस छ । जबकि हिजोसम्म अधिकतम तापक्रम २७ डिग्री थियो,’ सिमरा विमानस्थल मौसम शाखाका प्राविधिक लक्ष्मण प्रसाद कँडेलले भने ।
बिहान एकछिन मौसम खुले पनि दिनभर हुस्सु लागेका कारण सिमरा विमानस्थलबाट हुने उडान अवरुद्ध भएको बुद्ध एयर सिमरा शाखा प्रमुख सुरेश रेग्मीले जनाए ।
सामान्यतया सिमराबाट काठमाडौँ हवाइ उडानका लागि २ हजार ४ सय भिजिबिलिटी (पारदर्शिता) आवश्यक पर्दछ । तर आज दिनभर सिमरा विमानस्थलको भिजिबिलिटी अधिकतम् १ हजार ५ सयमात्रै थियो ।
सिमरा विमानस्थलबाट बुद्ध, यती, श्री एयरलाइन्स कम्पनीले ठुला–साना जहाज गरेर एक दर्जन उडान भर्ने गर्दछन् ।
