चिनियाँ विदेशमन्त्री वाङ यी नेपालमा

काठमाडौं– चीनका स्टेट काउन्सिलर तथा विदेशमन्त्री वाङ यी तीन दिने भ्रमणका लागि नेपाल आइपुगेका छन् । पाकिस्तान भ्रमण सकाएर ६ः १५ बजे नेपाल आइपुगेका मन्त्री यी भदौं २४ स्वदेश फर्किने कार्यक्रम रहेको छ । अक्टोबरमा हुने चिनियाँ राष्ट्रपति सी चिनफिङको भ्रमणको तयारीका लागि उनी नेपाल आइपुगेका हुन् । 

राष्ट्रपति सी नेपाल भ्रमणमा आउँदा कुन कुन विषयमा छलफल गर्ने र सहमति गर्ने विषयको टुङ्गो लगाउनका लागि उनी नेपाल आएको बताइएको छ । नेपालस्थित चिनियाँ राजदूतावासका अनुसार मन्त्री यीले राष्ट्रपति सीको नेपाल भ्रमणका एजेण्डाहरुको विषयमा छलफल गर्नुका साथै त्यसलाई अन्तिम रुप दिएर फर्किने कार्यक्रम रहेको छ । 

 

उनलाई विमानस्थलमा स्वागत गर्नका लागि परराष्ट्र मन्त्रालयका सचिव शंकरदास वैरागी गएका थिए । द्वारिका होटलमा बस्ने मन्त्री यीले भोलीदेखि उच्चस्तरीय भेटघाट गर्ने कार्यक्रम रहेको छ । नेपालले चीनसँग बीआरआई सम्झौता, केरुङ–काठमाडौं रेलमार्ग लगायतको विषयमा छलफल हुने बताइएको छ ।

त्यसका साथै प्रधानमन्त्री केपी शर्मा ओली, राष्ट्रपति विद्यादेवी भण्डारी लगायतसँग भेटघाट गर्ने कार्यक्रम रहेको छ । मन्त्री यीको नेपाल भ्रमण तेस्रो हो । उनको यो भ्रमण तीन वर्षपछि भइरहेको छ ।